Ymeri: Vetëvendosje po rritet, jemi bërë 23 mijë

“Jo negociata, Vetëvendosje” ishte parulla që për herë parë u shkrua në ndërtesën e UNMIK-ut, në vitin 2005, nga disa aktivistë, kohë prej së cilës edhe u krijua Lëvizja Vetëvendosje. Sot bëhen 11 vjet nga ai aksion, përmes së cilit aktivistët shprehën kundërshtimin e tyre për negociata me Serbinë dhe kërkesën për vetëvendosje.

Në përvjetorin e krijimit të Lëvizjes, kryetari i saj Visar Ymeri tha se do të ndjekin rrugën e vetëvendosjes, siç e quajti ai, rrugë e qytetarëve të lirë, këmbëngulës e të barabartë.

Kryetari i LVV-së, tha se përkrahja e qytetarëve është kushti i suksesit për konceptin e tyre politik.

“Parulla jonë ‘Jo negociata, Vetëvendosje’ merr një kuptim të drejtë. Pas gjithë këtyre viteve u dëshmua që rruga e ndjekur deri tash, ajo e institucioneve dhe politikanëve të korruptuar e kriminalizuar është rrugë e ndarjes së Kosovës në vija etnike, rrugë e shpronësimit të Kosovës, uzurpimit të pasurisë, kapjes së shtetit dhe përdhosjes së dinjitetit të qytetarëve. Neve na mbetët vetëm një rrugë përpara; rruga e qytetarëve të lirë e barabartë, të dinjitetshëm, këmbëngulës në të drejtën për veten dhe për tjerët. Kjo është rruga që na sovranizon e na bashkon, na zhvillon e integrim, kjo është rruga e vetëvendosjes dhe rruga e Lëvizjes Vetëvendosje”, tha ai, raporton KP.

Duke folur për 11 vjet ekzistencë, Ymeri tha se çdo ditë e më shumë Lëvizja Vetëvendosje po rritet.

“Janë këto vite të një përpjekje vetëmohuese për ta çliruar Kosovën, dhe një Republikë të qytetarëve, ku vullneti i qytetareve është edhe baza edhe çlirimi i demokracisë, ku barazia e qytetarëve është edhe pikënisje edhe pikësynim i aparatit shtetëror. Gjatë këtyre 11 viteve Lëvizja ka shënuar një rritje të madhe, si konceptualisht ashtu edhe në aspektin organizativ. Sot Lëvizja Vetëvendosje numëron mbi 23 mijë anëtarë, ndërkohë që është i vetmi subjekt politik në Kosovë që aplikon demokraci cilësore të brendshme, sipas parimit një anëtar një votë dhe ku vendimet e mëdha mirren me votë të drejtpërdrejtë nga të gjithë anëtarët e saj”, tha ai.

Nënkryetarja, Fatmire Kollçaku tha se është dëshmuar nevoja e krijimit të Lëvizjes Vetëvendosje. Ai tha se do të vazhdojnë angazhimin edhe me punën brenda Kuvendit të Kosovës.

“Lëvizja Vetëvendosje ka jep provën se ka pas nevojë të krijohet që në kohën kur 11 vite më herët u krijua si kundërshtim i elitave politike dhe vendimeve të dëmshme që merreshin në dëm të vendit tonë, ashtu është edhe më e madhe nevoja e ekzistencës së Lëvizjes Vetëvendosje. Ju e dini që ne këto ditë jemi rikthyer në Kuvendin e Republikës, që të vazhdojmë me angazhimin dhe përkushtimin tonë dhe përpjekjen që të krijojmë një jetë më të mirë për qytetarët e Republikës. Shumë ligje këto ditë qoftë do të amandamenetohen, qoftë do të miratohen”, tha ajo.

Këtu ajo përmendi ligjin e punës, çështjen e lehonisë dhe atë të pensioneve.

Lëvizja Vetëvendosje është subjekti opozitar që prinë me organizimin e tubimeve dhe protestave, në kundërshtim të Qeverisë. Gjithashtu, edhe me aksione të ndryshme brenda dhe jashtë ndërtesave të institucioneve të vendit. Sot 11 vjet pas krijimit, Lëvizja Vetëvendosje është subjekti më i madh opozitar, që po vepron e vetme, meqë aktualisht, mes tyre dhe dy partnerëve të koalicionit, AAK dhe NISMA, nuk ka pajtueshmëri rreth mënyrës së kundërshtimit të qeverisjes aktuale.

- Advertisement -

MË TË FUNDIT