Xhavit Haliti ka reaguar ashpër ndaj disa raportimeve për një përfshirje eventuale të tij në tregtinë për certifikata të veteranëve të UÇK’së.
Ai ka thënë se raportimet nuk kanë të bëjnë me të vërtetën, dhe ka shtuar se personat për të cilët thuhet se janë të lidhur me Halitin, për të janë të panjohur, shkruan gazetametro.net.
“Dje (e mërkurë), disa media kanë raportuar sikur qenkam i implikuar në rastin e tregtisë me certifikata të veteranit të UÇK-së. Ky raportim nuk ka të bëjë asgjë me të vërtetën faktike. Personat që përfliten në këtë rast, për mua janë thjeshtë të panjohur. Për ta nuk kam dëgjuar asnjëherë më pare”, ka thënë Haliti.
Ndërkaq, Haliti ka ftuar prokurorinë që të deklarohet rreth këtij rasti dhe, siç thotë nënkryetari i Kuvendit, të jap sqarimet e nevojshme lidhur me këtë rast.
Haliti, ndërkohë, ka ftuar prokurorinë që të hetojë po ashtu të gjithë keqpërdorimet rreth certifikatave për veteran të UÇK’së.
Ndryshe, dje u raportua se në disa përgjime telefonike personat e arrestuar dje në Mitrovicë për blerje dhe shitje të ceritifikatave të veteranëve, kanë përmendur Xhavit Halitin.
