Toni Domgjoni, prurja e re te Kosova: Lojtar i Vitesse, ka lindur në Kroaci, luan si mesfushor

Përzgjedhësi i Përfaqësueses së Kosovës, Bernard Challandes, ka publikuar listën e futbollistëve për dy ndeshjet kualifikuese të Kupës së Botës “Katari 2022” që zhvillohen në muajin tetor, ku risia më e madh është prurja e Toni Domgjoni.

‘Dardanët’ do t’i zhvillojnë dy ndeshje gjatë këtij muaji në kuadër të kualifikimeve për “Katar 2022”, kundër të Suedisë në Solna, më 9 teto dhe Gjeorgjisë më 12 tetor në stadiumin “Fadil Vokrri” në Prishtinë.

Pjesë e listës si befasi është edhe futbollisti i Vitesses, Toni Domgjoni, por i cili ende është në pritje për të marrë lejen nga FIFA për t’u paraqitur në fanellën e Kosovës.

Kush është Toni Domgjoni?

Shqiptari 23 vjeçar ka lindur në Koprivnica të Kroacisë, ku e ka filluar edhe karrierën si futbollist.

Ai si fëmijë ka luajtur për klube si Sleven Belupo dhe Koprivinca para se të kalonte te Zurich.

Ai me klubin zviceran luajti në të gjitha kategoritë e reja, derisa sa e bëri debutimin në ekipin A në 11 prill 2018.

Te ekipi i parë i Zurich luajti për tre vite, ku kishte 106 paraqitje duke shtuar edhe 7 gola dhe duke dhuruar 7 asistime.

Këtë verë ai kompletoi transferimin te Vittesse, ku deri më tani ka bërë dy paraqitje.

Mesfushori i ri, ka luajtur për kateogritë e reja të Zvicrës në U-18, U-19, U-20 dhe U-21.

Kryetari i FFK-së, Agim Ademi i uron mirëseardhje

Kryetari i FFK-së, Agim Ademi i ka uruar mirëseardhje, Toni Domgjonit te Kosova, duke treguar se ende nuk e ka lejën nga FIFA, gjë që po e pret FFK.

“Futbollisti i klubit holandez Vitesse, Toni Domgjoni është futbollisti i radhës që i bashkohet Kombëtares së Kosovës. Domgjoni ish-futbollist i FC Zurichit dhe i ekipit kombëtar U-21 të Zvicrës, ka vendosur ta përfaqësojë vendin e tij të origjinës, duke ndërmarrë një hap të rëndësishëm për karrierën e tij dhe duke vendosur që kontributin e tij ta japë në ekipin kombëtar të vendit të tij”.

“Dokumentacioni i Domgjonit nuk është i kompletuar akoma dhe ai mbetet në pritje të lejes nga FIFA në mënyrë që të ketë të drejtë të paraqitet në ndeshjet e muajit tetor dhe për këtë gjë Federata e Futbollit të Kosovës është duke bërë maksimumin. Në këtë aspekt, FFK-ja dëshiron të falënderojë edhe institucionet shtetërore, përkatësisht Presidencen dhe Ministrinë e Punëve të Brendshme për ndihmën e dhënë në pajisjen e Domgjonit me pasaportën e Kosovës”.

“Në emër të Federatës së Futbollit të Kosovës, Toni Domgjonit i uroj mirëseardhje në ekipin kombëtar dhe shpresoj që shpejt shembullin e tij ta ndjekin edhe shumë futbollistë kosovarë që janë në Evropë”, ka thënë Agim Ademi.

Lojtari mund ta bëjë debutimin nisë merr leje nga FIFA në ndeshjet e tetorit. /Telegrafi/

- Advertisement -

MË TË FUNDIT