Eshtë zhviuar sot takimi i përbashkët i krerëve të institucioneve të sistemit të drejtësisë dhe policisë së Republikës së Kosovës dhe atyre të EULEX-it.
I kryesuar nga ushtruesi i detyrës së kryeprokurorit të Shtetit, Sylë Hoxha, sot është mbajtur takimi i përbashkët në mes të krerëve të institucioneve të sistemit të drejtësisë dhe policisë së Republikës së Kosovës dhe atyre të EULEX-it.
Në këtë takim, përveç u.d. të Kryeprokurorit të Shtetit, Sylë Hoxha, morën pjesë edhe Kryesuesi i Këshillit Gjyqësor të Kosovës, Enver Peci, Drejtori i Policisë së Kosovës, Shpend Maxhuni, përfaqësuesi i Gjykatës Supreme, si dhe krerët e gjyqtarëve dhe prokurorëve të EULEX-it.
Qëllimi i këtij takimi ishte koordinimi më i mirë, thellimi i bashkëpunimit dhe shkëmbimi i informatave në luftën e përbashkët kundër krimit të organizuar dhe korrupsionit.
Gjatë këtij takim, krerët e institucioneve pjesëmarrëse pasi vlerësuan bashkëpunimin e deritashëm në mes të institucioneve vendore të drejtësisë dhe atyre të EULEX-it, u pajtuan që përveç vazhdimit, bashkëpunimi të thellohet me anë të koordinimit sa më të mirë dhe shkëmbimit permanent të informatave në mes tyre, me qëllim, siç than ata, që lufta kundër korrupsionit dhe krimit të organizuar të jetë sa më efikase dhe të ketë një pasqyrë reale në punën që është duke u bërë në luftën kundër këtyre dukurive.