Shtrenjtimi i grurit frikëson francezët, mund të rritet çmimi i bukës së famshme

Rritja e kostos së grurit po i alarmon amvisëritë franceze, që po frikësohen për rritje të mundshme të çmimit të bukës së famshme “baguette”, që nga shumë njerëz shihet si matëse e shëndetit ekonomik të vendit.

Shumë furra buke në Francë kanë publikuar njoftime për t’i paralajmëruar klientët se buka e gjatë dhe e fortë mund të shtrenjtohet për 3 deri në 5 centë, nga çmimi mesatar prej 89 centësh.

“Ndonëse kjo mund të mos duket shumë, është një rritje e madhe. Buga baguette është e çmuar. Është shtrenjtuar vetëm për 23 centë në 20 vitet e fundit”, tha Dominique Anract, kryetar i Shoqatës Franceze të Furrave dhe Shitoreve të Brumërave.

Rritja e paralajmëruar e çmimit në industrinë e bukës është lidhur me një rritje globale prej 30 për qind të çmimit të grurit nga shtatori për shkak të rendimenteve të dobëta nga Rusia, tha Anract.

Sipas tij dhe ekspertëve të tjerë, faktor është edhe rritja e çmimit të energjisë, që po e bën më të shtrenjtë operimin e furrave, shkruan Associated Press, transmeton Gazeta Express.

Popullsia 67-milionëshe e Francës është konsumuese e zellshme e bukës baguette. Sipas të dhënave të institucionit “Vëzhguesi i Bukës”, francezët hanë 320 bukë baguette çdo sekondë. Kjo i bie gjysmë buke për person në ditë ose dhjetë miliardë bukë në vit.