Shasivar Haxhijaj: Dardan Molliqaj dhe të tjerët më sulmuan dhe kërcënuan

Shasivar Haxhijaj, këshilltari i ministrit të Bujqësisë, Memli Krasniqi i cili me metoda fashiste u largua nga makina e cila më pas iu shkatërrua nga Dardan Molliqaj dhe aktivistë të tjerë të VV’së, ka rrëfyer ngjarjen duke thënë se ajo çka është parë në media është vetëm pak nga gjithçka që ndodhi. Thotë se nga sekretari i Vetëvendosjes, Dardan Molliqaj dhe aktivistët të kësaj partie u sha dhe u kërcënua fizikisht.
“Sot, rreth orës 16:30 po shkoja në një takim zyrtar, me ftesën e ministrit Krasniqi, në kuadër të konferencës për agrobiznesin që ka filluar sot në Prishtinë, kur papritmas jam sulmuar me gurë nga një grup i protestuesve, të udhëhequr nga zyrtari i Vetëvendosjes, Dardan Molliqaj”, ka thënë ai, për Gaazetën Express.

Sipas tij, ajo çfarë qytetarët kanë parë në media është vetëm një pjesë e gjithë ngjarjes.

“Sulmi kishte nisur më herët, në rrugën Eqrem Çabej, pranë Fakultetit të Filologjisë. Unë kam qenë me veturë në kolonë, gjersa ata, të udhëhequr nga Dardan Molliqaj, më kanë sulmuar me gurë dhe mjete të forta derisa unë kam qenë brenda në veturë. Më pas, ky grup ka qenë edhe më i ashpër dhe më janë afruar dhunshëm, dhe duke më kërcënuar e fyer më kanë detyruar të dalë nga vetura”, tha ai.

Ai thotë se Dardan Molliqaj dhe sulmuesit e tjerë e kanë tërhequr me dhunë nga vetura, duke e sharë e duke e kërcënuar edhe fizikisht.

“Këtë gjë e kanë bërë edhe derisa jam distancuar nga ta, derisa e kanë demoluar tërësisht veturën. Pak më pas kanë arritur Policia e Kosovës së cilës ua kam dhënë deklaratën zyrtare për ngjarjen. Dëshiroj të falënderoj Policinë e Kosovës për sjelljen dhe reagimin e tyre dhe shpreh keqardhjen time për sjelljet vandale të aktivistëve të partive politike opozitare”, thotë këshilltari i ministrit të Bujqësisë.

“Gjithë miqtë e mi dhe familjarët i njoftoj se jam shëndosh e mirë dhe se unë do të vazhdoj të kryejë detyrën time me nder dhe përkushtim, siç kam bërë në çdo kohë, që nga periudha e luftës e deri tash”, thotë ai.

- Advertisement -

MË TË FUNDIT