Reshjet e shiut kanë përmbysur sheshin “Zahir Pajaziti” në Prishtinë.

Përderisa uji ka mbuluar një pjesë të madhe të sheshit, erërat dhe reshjet kanë shkaktuar edhe dëme materiale tek shtëpizat që gjenden në shesh.

Në pamjet e publikuara, shihet dëmi i shkaktuar nga reshjet e shiut.

E qytetarët prishtinas nuk kanë hezituar që të ironizojnë me situatën e krijuar.

Në një fotografi ata shihen teksa ‘peshkojnë’ në pellgun e krijuar nga shiu në sheshin ‘Zahir Pajaziti’.

Përpos Prishtinës, reshje ka edhe në disa komuna tjera të Kosovës, teksa sipas parashikimeve, nesër në Kosovë do të mbajë mot kryesisht i vranët.

Instituti Hidro Meteorologjik i Kosovës ka njoftuar se të hënën pritet të mbaj mot kryesisht me vransira, e nga orët e mëngjesit me kushte për rrebeshe e bubullima, të cilat vazhdojnë edhe orëve të mbrëmjes.

Rrebeshet lokalisht mund të jenë më intensive, e nuk përjashtohen mundësitë edhe për breshër.