Popullsia e Kosovës u zvogëlua për 33 mijë banorë

Agjencia e Statistikave të Kosovës (ASK) ka publikuar raportin mbi “Vlerësimin: Popullsia e Kosovës 2015”.

Sipas një njoftimi të ASK-së, ky publikim ofron të dhëna statistikore mbi popullsinë në nivel vendi dhe komune. ASK-ja do të vazhdojë ta bëjë këtë vlerësim, çdo vit, me qëllim që ta sigurojë serinë kohore të treguesve demografikë mbi ndryshimet në nivel territorial.

Po sipas ASK-së, baza e të dhënave për ta vlerësuar numrin e popullsisë për vitin 2015 është marrë nga numri i vlerësuar i popullsisë rezidente në Kosovë në fund të vitit 2014, nga lindshmëria, nga vdekshmëria dhe nga lëvizjet e popullsisë së Kosovës për periudhën 01 janar – 31 dhjetor 2015.

“Numri i lindjeve me banim rezident në Kosovë për vitin 2015 ishte 31 116 lindje, numri i vdekjeve ishte 8 884 dhe shtimi natyror ishte gjithsej 22 232. Numri i personave, që kanë imigruar (ardhur) në Kosovë gjatë vitit 2015 ishte 18 862 banorë, derisa numri i emigrantëve (larguar) kosovarë ishte 74 434 banorë dhe bilanci i migrimit për vitin 2015 ishte 55 572 persona”, thuhet në komunikatë.

Më tej shtohet se përkundër një shtimi natyror prej 22 232 banorëve, popullsia rezidente e Kosovës u zvogëlua për 33 340 banorë, për shkak të emigrimit (largimit) të theksuar në vitin 2015.

“Popullsia rezidente e Kosovës për vitin 2015 (31 dhjetor 2015) vlerësohet të jetë 1 771 604 banorë rezidentë”, thuhet në njoftim.

Në këtë publikim janë përfshirë edhe lëvizjet e brendshme të popullsisë (nga një komunë në tjetrën), ku numri i lëvizjeve te brendshme është vlerësuar të jetë 8 972 banorë. /Telegrafi/

- Advertisement -

MË TË FUNDIT