Mustafa e Vucic javën e ardhshme flasin për kodin telefonik

Kryeministri i Kosovës, Isa Mustafa dhe ai i Serbisë, Aleksandar Vucic do të takohen javën që vjen në Bruksel.
Këtë e ka konfirmuar zëvendësministri i Punëve të Jashtme, Petrit Selimi, në televizionin publik ka thënë se javën e ardhshme mbahet raundi i ri i bisedimeve në Bruksel, mes Kosovës dhe Serbisë.
Sipas tij, Kodi i Telefonisë mobile si kapitull do të mbyllet në bisedimet e ardhshme e gjithashtu edhe faturimi i energjisë dhe inkuadrimi i tetë komunave veriore në sistemin kosovar energjetik, për të kaluar në pikat tjera, siç është krijimi i Asociacionit.

Përkundër këtyre ngecjeve ne po shohim se do të lëvizim përpara sepse është plotësuar një pjesë e kushteve dhe hap pas hapi do të vazhdojmë deri te principet e ardhshme të normalizimit. Është e rëndësishme tash që kodi telefonik i Kosovës, integrimi sistemit energjetik, faturimi i rrymës në veri të bëhen në hapat e ardhshëm. Kodi telefonik është një çështje që po zgjidhet dhe besoj se në raundin e ardhshëm të bisedave në Bruksel, javën e ardhshme, midis dy delegacioneve ky kapitull do të mbyllet. Po ashtu do të mbyllet edhe kapitulli i faturimit të energjisë elektrike në veri dhe inkuadrimit të tërë komunave veriore në sistemin kosovar energjetik, që të dalim pastaj në pikat tjera që kanë qenë në Marrëveshjen e Brukselit, si për shembull krijimi i Asociacionit të Komunave sipas ligjeve dhe Kushtetutës së Republikës së Kosovës, ashtu siç është planifikuar edhe në Planin e Ahtisarit”, ka theksuar Selimi.

Dy ditë më parë ishte raportuar se takimi i dytë mes dy kryeministrave do të zhvillohet të martën.
Në kohën kur shumë gjëra në raportet e Kosovës me Serbinë kanë mbetur të pasqaruara, dhe kur Serbia pret që t’i mundësohet hapja e kapitullit të parë në procesin e negociatave të anëtarësimit në BE, për çka Gjermania dhe Britania e Madhe mendojnë se ende nuk janë përmbushur kushtet, një takim i ri i dy kryeministrave do të mund të zhvillohet të martën në mbrëmje në Bruksel, shkruante Koha Ditore.
Një takim i tillë, besonin diplomatët evropianë, do të mund të ndihmonte në ecjen përpara të implementimit të marrëveshjeve të arritura më parë dhe përparimin në normalizimin e raporteve.“Pa një përparim Serbia nuk mund të hapë kapitullin e parë të negociatave ndërkohë që edhe Kosova është në pritje të vendimit për të nënshkruar Marrëveshjen e Stabilizim-Asociimit. Pra, të dyja palët kanë interes për vazhdim të dialogut dhe për të dëshmuar përkushtimin e tyre”, i ka thënë  një zyrtar i BE-së në Bruksel kësaj gazete.
- Advertisement -

MË TË FUNDIT