“Më i rëndi në vitet e fundit”, gazetarja kosovare në Kroaci jep detaje për aksidentin tragjik

Të dielën rreth orës 06 e 30 të mëngjesit, ka ndodhur një aksident trafiku në Kroaci, ku një autobus me targa kosovare është aksidentuar dhe kanë vdekur 10 pasagjerë ndërkaq 44 të tjerë kanë pësuar lëndime.

Gazetarja e RTL Kroacia, Gentiana Fana, ka thënë se tetë prej të lënduarve janë në gjendje të rëndë shëndetësore.

“Për momentin 44 persona janë të lënduar, tetë prej tyre janë në gjendje të rëndë, në operime e përkujdesje intensive”, ka thënë Fana.

Në mesin e të lënduarve janë edhe 15 fëmijë.

“Diku rreth 15 të mitur ishin pasagjerë në këtë autobus, nga këta 15 të mitur një vajzë po thuhet që është e lënduar rëndë”, ka shtuar Fana për klankosova.

Ndërkaq 14 udhëtarë që s’kanë pësuar kurrfarë lëndimesh sipas Fanës janë në përkujdesje të Shtabit të Mbrojtjes Civile të Kroacisë.

Sipas saj ky ishte aksidenti më i rëndë që ka ndodhur viteve të fundit në Kroaci.

“Aksidenti që ka ndodhur mëngjesin e sotëm në Kroaci është aksidenti më i rëndë që ka ndodhur viteve të fundit në Kroaci, edhe vetë policët e personat që kanë dalë në vendin e ngjarjes ishin të shokuar nga ajo që gjetën atje”, është shprehur Fana.

Arsyet e aksidentit ende nuk dihen, por sipas saj më shumë detaje do të dihen në mbrëmje kur edhe do të mbahet një konferencë për shtyp.

- Advertisement -

MË TË FUNDIT