Nga fillimi i pandemisë së koronavirusit e deri më sot, virusi ka evoluar dhe simptomat e sëmundjes kanë ndryshuar. Humbja e nuhatjes dhe shijes ishte fillimisht një nga simptomat më të zakonshme të covid-19 dhe një tregues kryesor i sëmundjes, dhe tani është vetëm simptoma e nëntë më e zakonshme, transmeton FrontOnline.

Për më tepër, simptomat ndryshojnë si tek njerëzit që morën vetëm një dozë të vaksinës ashtu edhe tek ata që morën të dyja dozat dhe u infektuan, ka treguar një studim i ri nga Mbretëria e Bashkuar.

Sipas studimit, simptomat më të zakonshme tek njerëzit e pavaksinuar përfshijnë dhimbje koke, dhimbje të fytit, rrufë, ethe dhe kollë të vazhdueshme. Simptomat që shfaqen tek njerëzit që kanë marrë vetëm një dozë të vaksinës janë të ngjashme me ato që shfaqen tek ata që nuk janë vaksinuar.

Këto përfshijnë dhimbje koke, rrjedhje hundësh, dhimbje fyti, teshtitje dhe kollitje.

Autorët e studimit shpjegojnë se kolla që nuk largohet tani është ndër pesë simptomat më të zakonshme, por që teshtitja dhe rrjedhja e hundës shfaqen në një masë më të madhe, edhe pse më parë mendohej se këto simptoma nuk kishin lidhje me infeksionin.

Simptomat që shfaqen tek njerëzit që kanë marrë dy doza të vaksinës përfshijnë dhimbje koke, rrjedhje hundësh, teshtitje, dhimbje të fytit dhe humbje të nuhatjes.

Njerëzit të cilët u infektuan pas dy dozave theksojnë se simptomat e tyre zgjatën dukshëm më shkurt, gjë që sugjeron që ata kishin një formë më të butë të sëmundjes.

Studiuesit thonë se ndryshimi i simptomave mund të ndikohet nga fakti që virusi po ndryshon, por edhe nga fakti që grupet e tjera demografike tani janë duke u infektuar, kryesisht të rinjtë të cilët zakonisht kanë simptoma më të buta të sëmundjes./FrontOnline/