Korporata Energjetike e Kosovës, para një muaji, kishte hapur konkursin për drejtor menaxhues të kësaj korporate, pozitë të cilën që nga viti 2008 e mban Arben Gjukaj. Tani në garë për këtë post, janë 24 emra. Cili nga ta do të arrijë ta marrë pozitën që për 10 vjet e mbajti Arben Gjukaj. A do të ketë përplasje mes partive të koalicionit për ta ‘rrëmbyer’ këtë pozitë…? Kush është Arben Gjukaj?
Konkursi ishte i hapur deri më datë 20 prill 2018. Drejtori i ardhshëm menaxhues, do të ketë mandat 5 vjeçar.
Periskopi ka pasur qasje në emrat e kandidatëve për këtë pozitë, ku në një listë prej 24 sosh, duket një garë tejet e ashpër për postin kryesor për menaxhimin e KEK’ut.
Lista e emrave që kanë kandiduar për drejtor të KEK’ut, në vijim:
1.Besnik Hyseni
2.Agron Haxhiu
3.Shkumbin Bozhdaraj
4.Ilmi Azemi
5.Hymret Mydyti
6.Arsim Gjinovci
7.Mehmet Krasniqi
8.Istref Klinaku
9.Idriz Blakaj
10.Nexhat Kryeziu
11.Irfan Fejzullahu
12.Adil Januzi
13.Selatin Sadiku
14.Ali Krasniqi
15.Naser Rusinovci
16.Enver Gashi
17.Fatmir Shahini
18.Burim Maraj
19.Agim Millaku
20.Gazmend Amaxhemaj
21.Isak Kerolli
22.Agron Haxhiu
23.Lorik Haxhiu
24.Habib Basholli
Kush është Arben Gjukaj – njeriu që u ‘mbijetoi’ disa koalicioneve
Arben Gjukaj është drejtori i vetëm i një kompanie të madhe publike, i cili iu ka mbijetuar të gjitha koalicioneve qeveritare, shkruante Jeta në Kosovë, në një profil që ia kishte bërë Gjukajt.
Arben Gjukaj ishte zgjedhur drejtor i KEK’ut gjatë koalicionit qeverisës LDK-AAK, kur në krye të Bordit të Drejtorëve të kompanisë ishte ministri i atëhershëm i Energjisë nga radhët e AAK’së, Et’hem Çeku.
Gjukaj u avancua në pozitën e drejtorit menaxhues, prej nga nuk lëvizi as gjatë mandatit të Qeverisë Thaçi 1 dhe 2.
Kur Gjukaj ishte pyetur lidhur me afërsinë e tij, me atëherë kryeministrin Hashim Thaçi (tani president), ai kishte mohuar një gjë të tillë. Ishte i njohur rasti i avancimit në KEK, të kushëririt të Thaçit, Nijazi Thaçi, gjë të cilën, Gjukaj kishte mohuar se e kishte bërë.
Gjukaj pati telashe edhe me ligjin…
Drejtori i KEK’ut, Arben Gjukaj, është në mesin e të akuzuarve për tenderin 6 milionë euro të sigurimit fizik të objekteve të KEK’ut.
Në këtë rast gjyqësor Esat Tahiri dhe Milazim Lushtaku akuzohen për veprën penale mashtrim, ish- drejtori i prokurimit, Driton Pruthi; drejtori i KEK-ut, Arben Gjukaj; ish-kreu i OSHP-së, Hysni Hoxha akuzohen për keqpërdorim të pozitës ose autorizimit zyrtar, ndërsa kryetari i Skenderajt, Sami Lushtaku, akuzohet për shtytje në keqpërdorim të detyrës zyrtare.
Hetimet lidhur me këtë rast kishin filluar më 5 tetor 2012, ndërsa aktakuza ishte ngritur më 16 janar 2015.
Ndryshe, Korporate Energjike e Kosovës është ndërmarrje publike dhe në strukturën e saj përfshihen minierat e thëngjillit, njësitë gjeneruese të termocentraleve Kosova A dhe B, financat dhe kontabilitetin, shërbimet e korporatës dhe auditimin e brendshëm.
Në njoftimin e KEK-ut thuhet se kjo kompani aktualisht realizon të hyra vjetore prej rreth 150 milionë €.
