Fraksionet brena LDK-së, domosdoshmëri për ndryshime?

Një ndër partitë më të vjetra në Kosovë, Lidhja Demokratike e Kosovës (LDK) ka hyrë në një krizë të brendshme politike kohëve të fundit. Situata e rënduar nëpër degët e saj, dhe organizimi i procesit zgjedhor të brendshëm, në Obiliq ka krijuar një situatë përçarëse dhe të ftohtë, transmeton Indeksonline.

Kuvendi Zgjedhor që do të duhej të mbahej sot në degën e LDK-së në Obiliq është anuluar nga kryetari i tanishëm, Mehmet Krasniqi. Kështu është marrë vendim në një mbledhje të Kryesisë së Degës së Obiliqit të mbajtur mbrëmë deri në orët e vona të natës, ku morën pjesë edhe të deleguarit nga Kryesia Qendrore, Arsim Janova, Salih Morina dhe Naser Osmani.

Sipas informatave që janë publikuar sot, mësohet se ky takim është mbajtur nën tension dhe fjalor të ashpër mes anëtarëve të LDK-së.

Fraksionet në LDK nuk janë një gjë e re për opinionin kosovar. Që prej vdekjes së Presidentit Rugova, LDK ka humbur unitetin dhe konsolidimin e brendshëm partiak. Menjëhere pas vdekjes së Ibrahim Rugovës, LDK ishte ndarë në dy taborë me dhunë dhe skandal, ku primatin e të parit e mori ish-Presidenti dhe ish-Kryetari i Kosovës, Fatmir Sejdiu.

Fraksione të reja u paraqitën me ardhjen e Isa Mustafës, Kryeministrit aktual të Kosovës, në pozitën e të parit të LDK-së, me ç’rast Fatmir Sejdiu u distancua nga kryesia e re.

Së fundmi, rikthimi i Astrit Haraçisë ka zgjuar reagime të reja poashtu. Ai e mundi Teuta Sahatqinë në garën e brendshme partiake për të deleguarin në Kuvendin Zgjedhor të partisë në Gjakovë me 53 vota epërsi. Disa anëtarë të LDK-së kanë shprehur dyshimin e tyre mbi këtë rezultat zgjedhor brenda-partiak, por Kryetari i LDK-së në Gjakovë, Bekim Bytyçi e ka mohuar këtë gjë.

LDK duket se ka ardhur në një gjendje kritike ku ndryshimet janë të domosdoshme. Isa Mustafa, kryetari i tanishëm duket se do të përballet shumë shpejt me kandidatë të ri për të parin e LDK-së. Në diskursin mediatik, në masë të madhe janë përfolur si kandidatë të mundshëm Vjosa Osmani dhe ish-kryetari, Fatmir Sejdiu, por asgjë zyrtare nuk është konfirmuar ende.

Indeksonline tentoi të marrë deklarata nga përfaqësues të LDK-së për zhvillimet e fundit në këtë parti, por tentativat ishin të kota. Shumica nga zyrtarët e lartë të LDK-së nuk iu përgjigjën thirrjeve, ndërkaq Arben Gashi, deputet në Kuvendin e Kosovës nga radhët e LDK-së tha se nuk ka ndonjë koment për këtë situatë. /Indeksonline/

- Advertisement -

MË TË FUNDIT