Ballina Blog

Kosova sivjet me më pak grurë

Fermeri Valon Vehapi, nga Komuna e Lipjanit, këtë vit, gjatë fushatës së korrje-shirjeve ka arritur të sigurojë vetëm 3.000 kilogramë grurë në një hektar, apo përgjysmë më pak se vitin e kaluar.

Vehapi tregon se ka pasur të kultivuar mbi 100 hektarë sipërfaqe me kulturën e grurit. Kushtet klimatike sipas tij, gjatë këtij viti kanë qenë arsyeja e rënies së sasisë së rendimenteve.

“Nga një hektar sipërfaqe, sivjet kemi grumbulluar nga 2.800 deri në 3.300 kilogramë grurë, kurse vitin e kaluar kanë qenë nga 5.500 deri në 7.000 kilogramë për hektarë”, thotë Vehapi.

Sipas të dhënave të Ministrisë së Bujqësisë, gjatë këtij viti, rreth 68.000 hektarë tokë është e kultivuar me kulturë të grurit. Isuf Cikaqi, drejtor në Departamentin për Politika Bujqësore në Ministrinë e Bujqësisë, Pylltarisë dhe Zhvillimit Rural, për Radion Evropa e Lirë, thotë se në bazë të të dhënave preliminare, sasia e prodhimit të grurit është rreth 4.000 kilogramë për hektarë, edhe pse sipas tij, pritjet kanë qenë më të mëdha. Ai shprehet se me këtë sasi, Kosova sivjet do t’i plotësojë rreth 65 për qind të nevojave të popullatës me ushqim.

“Sipas nevojave në nivel vendi, nëse do mbilleshin 100.000 hektarë tokë me grurë dhe nëse rendimenti do të ishte prej 4.000 kilogramësh, atëherë i bie që Kosova të prodhojë 400.000 tonë grurë, sa janë edhe kërkesat dhe do të përmbusheshin nevojat për konsum”, shprehet Cikaqi.

Sipas të dhënave zyrtare, në Kosovë nevojat për këtë produkt për kokë banori, janë 205 kilogramë, që i bie se në Kosovë duhet të harxhohen 410.000 tonë grurë.

Vitin e kaluar, sasia e prodhimit të grurit ka paraqitur rekord, pasi deri në 4.700 kilogramë janë siguruar për hektarë, në rreth 63.000 hektarë sipërfaqe të mbjellur me këtë kulturë.

Se rendimentet e grurit gjatë këtij viti nuk janë në nivelin e kënaqshëm, thotë edhe Tahir Tahiri, kryetar në Federatën Sindikale të Bujqve të Kosovës. Ai thotë nëse fermeri nuk arrin të sigurojë deri në 4.500 kilogramë grurë për hektarë, atëherë bujqit nuk kanë llogari të merren me këtë veprimtari.

“Pjesa dërmuese e sipërfaqes se grurit është nën 3.000 kilogramë. Ata bujq që nuk arrijnë të sigurojnë deri në 4.500 kilogramë për hektarë, me çmimin e kilogramit të grurit që marrin mullinjtë 0.18 respektivisht 0.19 centë, nuk arrijnë të mbulojnë koston e prodhimit. Kështu që bujqit, për një ose dy vjet nuk mund të përballojnë këtë situatë dhe heqin dorë prej prodhimtarisë së grurit”, thekson Tahiri.

Blerësit dhe shitësit e grurit të pakënaqur me çmimet

Fermeri Valon Vehapi tregon se çmimi për një kilogram grurë të prodhuar në Kosovë, është 0.15 centë, kurse shitja bëhet 0.18 centë. Çmimi, sipas tij, është i njëjtë me grurin e importuar nga vendet e rajonit.

“Ne e prodhojmë grurin dhe e shesim në mullinj. Si prodhues, çmimi del 0.15 centë, kurse e shesim 0.18 centë. Politika e shtetit është katastrofë. Shteti nuk mbron prodhimin vendor sepse në periudhën e fushatës së korrje-shirjeve, deri sa të harxhohet sasia e grurit vendor, institucionet të vendosin taksa të ndryshme për grurin e importuar nga shtetet tjera”, thotë Vehapi.

Bashkim Zejnullahu, kryetar i Shoqatës së Mullisëve të Kosovës, në një prononcim për Radion Evropa e Lirë, konfirmon se ka filluar grumbullimi i grurit nga mullisët, me çmim deri në 0.19 centë, varësisht nga kualiteti dhe sasia. Por, Zejnullahu thekson se me grurë furnizohen edhe nga vendet e rajonit, për shkak të çmimit të leverdishëm.

“Më të shkelurit aktualisht janë fermerët, sepse ne si kompani komerciale, vendosim që të blejmë ku kemi llogari më të madhe. Kurse fermeri nuk ka shumë për të zgjedhur. Qeveria duhet t’i dalë në ndihmë fermerëve sepse shoqata nuk mundet”, thekson Zejnullahu.

Çmimi i ulët i grurit dhe mosmarrja e masave nga Qeveria e Kosovës për të mbrojtur fermerët, është arsyeja kryesore që ka ndikuar që Vehapi mos të rrisë sipërfaqen e tokës së mbjellë me grurë.

“Nëse shteti merr masa dhe të jetë serioz në këtë çështje, unë 500 hektarë tokë i mbjelli me grurë”, tha ai.

Në Ministrinë e Tregtisë dhe Industrisë (MTI) thonë se kohëve të fundit ka pasur kërkesa nga Shoqata e Mullisëve të Kosovës për dyshimet mbi çmimet damping të importit të miellit nga disa vende të rajonit, kërkesa të cilat janë duke u analizuar nga Departamenti i Tregtisë, mirëpo nuk ka pasur ndonjë kërkesë për mbrojtje të grurit mbi dyshimet e çmimeve damping të importit të grurit.

Kosova asnjëherë nuk ka arritur që të plotësojë nevojat e popullatës së saj me miell nga rendimentet e grurit. Vazhdimisht është varur nga importi, që kryesisht vjen nga vendet e rajonit dhe shtetet e Bashkimit Evropian.

Në vitin 2019, Kosova ka importuar 146 milionë kilogramë miellë dhe grurë, kurse vitin e kaluar 159 milionë kilogramë ose 13.3 milionë kilogramë më shumë se vitin paraprak.

Gruri është lëndë e parë për prodhimin e miellit. Duke marrë parasysh së në Kosovë nuk plotësohen nevojat e popullatës me prodhimin e grurit vendor, në përgjigjen e MTI-së, thuhet se importi i grurit mbetet shumë i rëndësishëm për sigurimin e sasive të mjaftueshme të grurit për të plotësuar nevojat e industrisë së përpunimit të grurit dhe të industrive tjera të cilat përdorin grurin/miellin për të prodhuar produkte vendore siç janë: buka, makarona dhe shumë produkte të tjera.

30 mijë kosovarë hyjnë në Shqipëri këtë të diel

Rritja e temperaturave dhe fillimi i gushtit ka sjellë një rritje të numrit të qytetareve të Kosovës që duan të kalojnë pushimet në Shqipëri.

Edhe mëngjesin e së dielës mijëra makina dhe dhjetëra autobusë kaluan nga Morina për në bregdetin shqiptar.

Ky fluks i lartë që i kalon 30 mijë shtetas të Kosovës ka sjellë bllokimin e segmentit Morinë-Kukës të Rrugës së Kombit.

Që në mëngjes automjetet të vendosura në dysh po ecin shumë ngadalë për të dalë nga Kukësi në një kohë ku temperaturat janë rreth 40 gradë./A2news/.

Vazhdon i nxehti përvëlues: Këto janë temperaturat për javën e ardhshme

Gjatë pesë ditëve të ardhshme situata meteorologjike në vendin tonë do të vazhdojë të mbetet pothuaj e ngjashme me ditët e fundit të muajit korrik, si pasojë e prezencës së masave të nxehta të ardhura nga Afrika Veriore.

Në fushat barike nuk kemi luhatje të theksuara, kështu që kjo situatë termike do të vazhdoj deri ditën e enjte ku parashihen rënie të përkohshme të temperaturave maksimale.

Përpos këtyre vlerave të larta të temperaturave maksimale, nuk përjashtohet mundësia për stuhi lokale të cilat përpos reshjeve dhe shkarkimeve elektrike do të shoqërohen edhe me erëra lokale të forta.

Temperaturat minimale mbeten pothuaj konstante me ditët e fundit , ndërsa maksimalet e ditës parashihen të kenë ulje të lehta. Minimalet ndërmjet 16-18 gradë Celsius, ndërsa maksimalet e ditës parashihen të lëvizin ndërmjet 27-37 gradë Celsius. Do të fryjë erë nga perëndimi dhe jugperëndimi e lehtë dhe lokale e fortë.

Apelohet te qytetaret që t’i respektojnë këshillat e IKPSH, gjithashtu apelohet te qytetaret të mos ndezin zjarre, pasi zjarret mund të jenë aq të furishme sa mund të rrezikojnë jetët e njerëzve dhe kuptohet asgjësimin e mikrofaunës, pastaj zjarret mund t’i dëmtojnë edhe sipërfaqet e mbjella me misër e që fatkeqësisht për shkak të mungesës së reshjeve dhe temperaturave ekstreme, kjo kulturë në shumë vende do të mbetet e pazhvilluar, duke zvogëluar rendimentet ose duke mos dhënë fare rendimente, thuhet në komunikatën për media të Institutit Hidrometeorologjik të Kosovës.

Mërgimtarët vazhdojnë të presin në kolona të gjata në Serbi për të hyrë në Kosovë

Edhe të dielën ka vazhduar fluksi i madh i veturave në vendakalimin kufitar në Merdare.

Lexues të Gazetës Online ‘Reporteri.net’ kanë dërguar në redaksi video nga Serbia ku shihet kolonë e gjatë veturash që presin të kalojnë nëpër pikën kufitare në Merdare.

Nga pamjet shihet se mërgimtarët po presin me orë të tëra që të hyjnë në Kosovë, shkruan Reporteri.net.

Ndryshe, gjatë ditës së shtunë, Policia ka apeluar te mërgimtarët që të shfrytëzojnë vendkalimet kufitare në Mutivodë, Dheu i Bardhë apo edhe Jarinjen, ku s’ka pritje të gjata.

“Andaj, kërkojmë, lusim në veçanti bashkatdhetarët, që në fakt janë shumica dërmuese e atyre që po presim me orë të tëra në këtë pikë kufitare, të shfrytëzojnë edhe pikat tjera kufitar, si: Pikën e Kalimit Kufitar Mutivodë, Dheu i Bardhë, por edhe atë në Jarinje ku aktualisht nuk ka pritjet të gjata”, thuhet në kërkesën e Policisë së Kosovës. /Reporteri.net

Zjarret në Suharekë vihen nën kontroll, Prizreni, Rahoveci dhe Mamusha i dalin në ndihmë

Kryetari i Suharekës, Bali Muharremaj tha se situata me zjarrin në zonën industriale në Shirokë është në kontroll.

Kjo sipas tij falë ndihmës së shpejt nga ekipet e zjarrfikësve të Prizrenit, Mamushës dhe Rahovecit.

Muharremaj tha se gjendja për momentin është në kontroll, por pavarësisht kësaj tha se janë në gjendje gatishmëri për arsye të temperaturave të larta, njofton Klankosova.

Kreu i Suharekës gjatë ditës kërkoi ndihmë nga komunat tjera për shkak të gjendjes serioze me zjarret në zonën industriale në Shirokë të Suharekës.

Varianti Delta përhapet me shpejtësi në SHBA, qytetarëve u kërkohet që të vaksinohen

Covid-19 Delta Variant concept with graphics

Në fillim të javës autoritetet shëndetësore amerikane u kërkuan të vaksinuarve plotësisht që të fillojnë të përdorin maskat përsëri në ambjentet e brendshme në zonat ku varianti Delta i COVID-19 po përhapet me shpejtësi. Qendrat Amerikane për Kontrollin dhe Parandalimin e Sëmundjeve (CDC) thonë se varianti Delta mund të përhapet edhe nga të vaksinuarit.

“Është e rëndësishme që njerëzit e vaksinuar të kuptojnë se nëse ndonjë prej tyre infektohet në zonat ku po përhapet virusi ata mund ta transmetojnë virusin tek njerëzit e tjerë”, tha drejtorja e CDC-së Rochelle Walensky.

Udhëzimet e reja vijnë dy muaj pasi agjencia u tha amerikanëve të vaksinuar se ata mund të hiqnin maskat. Këtë javë CDC-ja po ashtu rekomandoi që të gjithë nxënësit, mësuesit dhe punonjësit nëpër shkolla dhe kopështe deri në klasën e 12 të përdorin masaka, edhe nëse janë të vaksinuar.

Bob McCann me sistemin arsimor në Miçigan ngre pikëpyetje rreth udhëzimeve të përgjithshëme në arsim.

“Një qasje e përshtatshme për të gjithë ndoshta nuk do të funksionojë, ndaj do të duhet të sigurohemi që çdo komuniteti t’i jepet mundësia të bëjë atë që është më e mira për fëmijët e tyre.”

Ligjvënësi republikan Kevin McCarthy i Kalifornisë po ashtu nuk pajtohet plotësisht me udhëzimet.

“Ky është vetëm fillimi. Sepse së shpejti fillon shkolla, por ata do ta mbyllin përsëri shkollën. Kjo ka të bëjë me kontrollin.”

Ndërkohë, shumë biznese janë duke urdhëruar që punonjësit të vaksinohen. Këtë javë firmat Facebook, Google dhe Netflix thanë se do t’u kërkojnë punonjësve që të vaksinohen. Vendime të ngjashme janë marrë nga qeveri lokale, përfshirë shtetin e Nju Jorkut, dhe mbi 600 universitete në Shtetet e Bashkuara. Dr. Robert Wacher është me Universitetin e Kalifornisë në San Françisko.

“Udhëzimi është mjaft i mirë. Fatkeqësisht pandemia ka arritur në atë pikë ku thjeshtë kërkohet vaksinimi i sa më shumë njerëzve, ndryshe nga gatishmëria e njerëzve në kushtet aktuale.”

Afërsisht 56% e amerikanëve mbi 12 vjeç janë vaksinuar plotësisht.

Dr. Lavdim Halilaj nga Drenasi bën emër në fushë e inteligjencës artificiale në Gjermani

Karvanit të sukseseve të shqiptarëve nëpër botë tash e një kohë ju bashku edhe Lavdim Halilaj nga Drenasi, i cili jeton dhe vepron në Gjermani.

Puna e tij në inteligjencën artificile po vlerësohet jashtëzakonisht shumë, si në vendin ku jeton dhe vepron ashtu edhe më gjërë.

Se kush është Lavdimi dhe me çka po bën emër në Gjermani dhe më gjërë, mund të lexoni më poshtë:

Pas përfundimit të doktoraturës në Universitetin e Bonn-it, Lavdimi ka vazhduar punën si Post-Doktorant në Institutin Fraunhofer Intelligente Analyse- und Informationssysteme IAIS, ku ka udhëhequr projekte të ndryshme hulumtuese me partnerë të ndryshëm nga industria gjermane.

Që nga Prilli 2019 ka filluar punën në kompaninë internacionale Bosch, e cila ka rreth 400 mijë punëtorë dhe një qarkullim vjetor prej mbi 70 miliard eurosh, ku rreth 5 miliard euro investohen çdo vit në fushën e hulumtimeve shkencore dhe zhvillimit (Research and Development). Aty Lavdimi është i angazhuar si hulumtues shkencor në Coporate Research në fushën e Intelegjencës Artificiale dhe Knowledge Engineering në projekte që ndërlidhen me automated driving dhe vetura autonome.

Ai gjithashtu udhëheq projekte të financuara nga qeveria gjermane, ku Bosch së bashku me kompani tjera si Mercedes, Porche, BMW dhe institucione tjera akademike si Universiteti i Shtutgartit, Tübingen-it, München-it, German Aerospace Center, realizojnë hulumtime në lidhje me aplikimin e zgjidhjeve komplekse nga fusha e Machine Learning. Edhe pas kalimit në industri, Lavdimi ka vazhduar të jetë aktiv në akademi, dhe së fundi ka publikuar një numër të punimeve shkencore të cituara me qindra herë, ku disa prej tyre janë në proces të aplikimit si zgjidhje të patentuara nga kompania Bosch. Ai gjithashtu është mentor i studentëve të doktoraturës dhe masterit në bashkëpunim me Universtitetin e Trierit.

Që nga viti 2020, Lavdimi punon edhe si Profesor Asistent në Kolegjin Universum në Prishtinë, ku ligjëron lëndë nga fusha e Intelegjencës Artificiale dhe ndan përvojën nga industria gjermane me studentët e këtij kolegji.

Lavdimi është i martuar me Lauretën me të cilën kanë dy fëmijë dhe jeton dhe vepron në Gjermani në landin e Baden-Württemberg-ut.

Suharekë : 200 hektarë përfshihen nga zjarri, flakët po përhapen me shpejtësi (VIDEO)

Në  fshati Studençan dhe fshati Tërnje në  afërsi të  komunës së  Suharekë se është kapluar nga zjarri gjatë  pasdites të  së  dielës.

Zëdhënësi i policisë për këtë rajon, Vesel Gashi ka bërë të ditur që një zonë prej 200 hektar e cila është  shumica me shkurre  dhe një  pjesë e malit është  kapluar nga flakët dhe se ajo është duke avancuar me shpejtësi shkaku i temperaturave dhe erërave të forta.

Departamenti i zjarrfikësve bashkë me qytetarët dhe policinë  janë  në  vend të  ngjarjes duke e lokalizuar zjarrin.

E trishtë! Humb jetën një pushues nga Kosova në plazhin e Shëngjinit

Një pushues nga Kosova ka humbur jetën këtë të dielë në plazhin e Shëngjinit.

Mësohet se 68-vjeçari I.Th., ka qenë duke pushuar në plazhin e Shëngjinit, ndërsa dyshohet se ka pësuar arrest kardiak.

68-vjeçari është dërguar menjëherë në spitali, por nuk ka mundur të shpëtojë. Ndërkaq grupi hetimor po punon për sqarimin e plotë të rrethanave të ngjarjes

100 raste të reja me COVID-19 në 24 orët e fundit në Kosovë

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon:

Nga 2.849 testime, 100 qytetarë kanë rezultuar pozitiv me virusin COVID-19.

Gjatë 24 orëve të fundit, nuk është shënuar asnjë rast i vdekjes.

Sot janë shëruar 3 qytetarë, derisa numri i përgjithshëm i të shëruarve është 105.660.

Në total numri i rasteve aktive është 539.